Undirritun samstarfsyfirlýsingar um samstarf varðandi fjármögnun íslenskra verkefna erlendis.
Iðnaðar- og viðskiptaráðuneyti
Nr. 12/1996.
Þriðjudaginn 14. maí 1996 kl. 18:00 verður undirrituð sameiginleg viljayfirlýsing milli iðnaðar- og viðskiptaráðuneytis, Iðnþróunarsjóðs og Hollenska fjárfestingarsjóðsins FMO varðandi samstarf um fjármögnun íslenskra verkefna erlendis.
FMO er sjóður sem er í eigu Hollenska ríkisins (51%), stærstu viðskiptabanka Hollands (40%) og Hollenskra einkafyrirtækja (9%). Sjóðurinn hefur fjármagnað verkefni í yfir 60 ríkjum og eru heildareignir um 2 milljarðar Bandaríkjadala.
FMO hefur víðtæka sérþekkingu og reynslu af fjármögnun verkefna í flestum þeirra ríkja sem íslenskir aðilar hafa sýnt áhuga á að starfa í og því er mikill fengur að þessu samstarfi.
Samkvæmt yfirlýsingunni munu FMO og Iðnþróunarsjóður taka upp formlegt samstarf um fjármögnun verkefna á vegum íslenskra fyrirtækja í þróunarríkjunum. Þá mun FMO einnig veita Iðnþróunarsjóði aðstoð varðandi mat á verkefnum og veita ráðgjöf varðandi samstarf við aðra alþjóðlega sjóði og fyrirtæki, sem FMO er þegar í samstarfi við. Gerður verður formlegur samstarfssamningur milli sjóðanna á grundvelli fyrrgreindrar viljayfirlýsingar.
Yfirlýsingin verður undirrituð í Borgartúni 6, og er blaðamönnum boðið að vera viðstaddir undirritunina og fá nánari upplýsingar um FMO og efni viljayfirlýsingarinnar.
Reykjavík, 14. maí 1996.
